Бајрамовска-Мустафа бара да се преиспита спроведувањето на физичката настава, Царовска вели дека протоколите се добри
Бараме да се разгледа предлогот за скратување на часовите и не гледам дека ова е мешање на Народниот правобранител во плановите на МОН и Комисијата за заразни болести, вели државната советничка на Народниот правобранител, Васка Бајрамовска-Мустафа
Имавме случаи на ковид-19 од надвор, но внатре меѓу учениците не се прошири вирусот. Тоа покажува дека протоколот е добар ако добро се спроведува, вели министерката Мила Царовска
-Децата носат заштитни маски по неколку часови во текот на денот и за тоа Народниот правобранител добил поголем број на поплаки од родители, дури имало реакции и од родители на деца со попреченост кои поради нивната здравствена состојба не смеат да носат маски, вели државната советничка на Народниот правобранител во вечерашната дебата на „360 степени“, Васка Бајрамовска-Мустфава.
Министерската за образование и наука, Мила Царовска, пак вели дека сите протоколи за наставата со физичко присуство биле изготвени од Комисијата за заразни болести и тоа врз основа на детални информации и бројки по возраст на децата и анализи за евентуална трансмисија на ковид-19 кај оваа популација.
-Има поплака од родител на дете со попреченост кое оди во инклузивно основно училиште, но неговото дете не смее да носи заштитна маска поради другите здравствени предизвици, а протоколот пропишува дека сите деца треба да носат маски. Дури и во Законот за заштита на населението од заразни болести посочено е дека децата со попреченост и да не носат маски, вели Бајрамовска-Мустафа.
Министерката пак, Царовска, вели дека ваквите индивидуални случаи се решавале секојдневно во координација со локалните самоуправи под чија надлежност се училиштата.
-Вакви поединечни случаи не треба да ја даваат генералната слика. Ние овие случаи ги решаваме поединешно со локалните самоуправи и со директорите на училиштата. Вакви поединечни случаи се појавуваат и се надминуваат на дневно ниво. Кај Народниот правобранител дошле може една, две или пет претставки, но училиштата се соочуваат со 240 илјади поединечни приказни и сите се различни. Имало ваков случај каде на дете со попреченост му е дозволено маската да не ја носи, тоа го решаваме на локално ниво, рече Царовска.
Бајрамовска-Мустафа посочи дека бројни поплаки стигнуваат од родители за тоа дека децата поминуваат долго време во училиште, со маска, на провев и тие предложуваат до МОН да ги разгледа овие поплаки заедно со Комисијата за заразни болести и да се скратат часовите.
-Укажуваме да се скратат часовите, бидејќи зависно во кое одделение се децата седат со маски по четири, пет, шест или седум часа, а имаат можност да ги тргнат маските само за време на одморите. Но, и тогаш, самите наставници кажуваат дека не можат да ги контролираат дали тие ќе имаат контакт меѓусебе. Затоа, бараме да се разгледа предлогот за скратување на часовите на сметка на одморите и не гледам дека ова е мешање на Народниот правобранител во плановите на МОН и Комисијата за заразни болести, рече Бајрамовска-Мустафа.
Царовска на ова возврати дека Комисијата за заразни болести ниту еднаш не укажала дека децата добиваат некакви здравствени потешкотии од носењето на маските.
-Во овие две и пол недели се покажа дека носењето на маските и проветрувањето на училиниците спречи интерна трансмисија на вирусот. Ние имавме случаи на ковид-19 од надвор, но внатре меѓу учениците не се прошири вирусот. Тоа покажува дека протоколот е добар ако добро се спроведува. Дополнително, Комисијата за заразни болести нема укажувања дека носењето на маските некако влијае на здравствената состојба на децата, рече Царовска.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа