Царовска: Од септември учениците ќе добиваат зголемени стипендии

Во просек за 11 % се зголемуваат ученичките стипендии, кои ќе се исплаќаат со почетокот на новата учебна година. Со владината одлука, која е донесена во понеделникот, наместо досегашните од 2.200 до 2.970 денари на месечно ниво, учениците ќе добиваат стипендија во висина од 3.500 денари. Вкупниот годишен износ што ќе се распределува за оваа намена од речиси 87 милиони денари се зголемува на 97,8 милиони денари, а ќе бидат опфатени 3.100 ученици.

Ова го најави министерката за образование и наука, Мила Царовска, по средбата со средношколските и студентските здруженија, кои ја поздравија одлуката за зголемување на износите и воведување нови стипендии.

„Заедно со претставниците на средношколците и со работната група МЛАДИ-МОН, изминатите десет месеци работевме на анализи и план за зголемување на ученичките стипендии со цел да ги стимулираме нивниот труд, знаења и успеси, но и да ги поттикнеме да се запишуваат во дуалните паралелки, кои заедно со стопанските комори, компаниите и локалните самоуправи ги воспоставивме во средните стручни училишта. Политиката на стипендирање е проширена како од аспект на видовите стипендии, имаме повеќе нови категории за да се опфатат што повеќе млади, но и значително зголемени износи за голем дел од постојните за навистина да ја почувствуваат материјалната поддршка од државата“, рече Царовска.

Министерката истакна дека фокусот на уписните политики е средното стручно образование, кое се покажува како дефицитарно и нуди просперитет за младите, затоа најмногубројна категорија се стипендиите за ученици што ќе се запишат во дуални паралелки во четиригодишно стручно образование, но и ученици што ќе се запишат во тригодишно средно стручно образование.

„Поголема категорија се и стипендиите за социјална поддршка за да им излеземе во пресрет на учениците чии семејства имаат месечни приходи под она што значи оптимум за нормално живеење и функционирање“, рече Царовска.

За сите видови стипендии ќе се објавуваат конкурси и заинтересираните навремено ќе бидат информирани за сите услови, критериуми и рокови за остварување на ова право, најавија од МОН.