Германија поради Ковид-19 бележи рекорден јавен долг

Јавниот долг на Германија оваа година поради пандемијата на коронавирусот достигна рекордни 2,1 билион евра, објави Државниот завод за статистика.

– Вкупниот јавен долг на државата, покраините и општините е зголемен во споредба со крајот на минатата година за 11 отсто, па кон крајот на јуни изнесувал 2,1 билион евра, се наведува во соопштението на Заводот во Висбаден.

Тоа е највисокиот кога било забележан јавен долг во Германија.

Порастот се поврзува со воведените рестриктивни мерки во борбата против последиците од пандемијата на Ковид-19.

Најмногу се зголемил јавниот долг на федерацијата, а кај сојузните покраини тоа се случило во Северна Рајна-Вестфалија.

Но и покрај високото ниво на јавниот долг, економистите порастот не го сметаат за драматичен.

– Зголемувањето на државниот долг е сосема соодветно дури и кога станува збор за толку големи износи бидејќи со тоа е спречена уште полоша финансиска криза, изјави Јенс Суедекум, професор на Универзитетот во Дизелдорф.

Тој смета дека државата „добро ќе го поднесе“ новото задолжување, бидејќи практично не плаќа камата.

Во Бундестагот моментно се разгледува буџетот за следната година, кој предвидува нови задолжувања од околу 90 милијарди евра.

Германскиот министер за финансии Олаф Шулц предупреди дека мерките за финансиска помош на економијата не смеат драстично да прекинат.

– Ако го направиме тоа сега, ризикуваме многу поголеми трошоци подоцна и со тоа ја доведуваме иднината во прашање, истакна Шулц денеска во Парламентот.

 

 

 

Добивајте вести на Viber

29.09.2020 - 18:39

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа