Костадинов: ВМРО-ДПМНЕ е против нов клинички центар - споредбите со Србија се тешка манипулација

ВМРО-ДПМНЕ предводена од Христијан Мицкоски е против нов Клинички центар, против подобри здравствени услуги за граѓаните, обвинува пратеникот и портпарол на СДСМ, Костадин Костадинов.

Вели, Мицкоски по секоја цена го кочи клиничкиот центар.

-Ставот на Мицкоски дека по секоја цена ќе го кочи законско решение со кое државата по 80 години ќе добие нов модерен Клинички центар е признание дека ВМРО-ДПМНЕ е цврсто застаната на спротивната страна од интересите на граѓаните, дека е цврсто застанат против здравствениот систем во нашата земја. Тврдењата дека во соседна Србија се изградил ист Клинички центар за далеку помала сума се тешка лага и обид за манипулација на јавноста.
Не држи тоа алиби на Мицкоски и ВМРО-ДПМНЕ за сето ова што им го прават на граѓаните и државата. Клиничкиот центар во Белград е само една зграда, кула изградена поодамна која сега е затворена и опремена. Клиничкиот центар во Скопје е цел комплекс со придружни објекти и претставува цел медицински град, рече Костадинов на прес-конференција во Собранието.

Според него, Мицкоски барал алиби за неговите, како што рече, срамни обиди да ја спречи најголемата капитална инвестиција во македонското здравство.

-Додека СДСМ и парламентарното мнозинство прават се за да го унапредат квалитетот на живот, Мицкоски и пратениците на ВМРО-ДПМНЕ прават се бојкотираат,  блокираат, ги кочат важните  законски решенија. Наместо за граѓаните и државата, пратениците на ВМРО-ДПМНЕ работат за интересите на докажаниот губитник Мицкоски. Таквото деструктивно, антинародно и антидржавно однесување е препознаено од граѓаните, затоа ВМРО-ДПМНЕ и  Христијан Мицкоски се постојано поразувани, затоа ќе бидат поразени одново и одново. Граѓаните треба да знаат дека и со и без ВМРО-ДПМНЕ, државата ќе добие нов модерен Клинички центар кој ќе им пружи интегрирани здравствени услуги на сите граѓани, вели Костадинов.