Левица: Овој договор не значи коалицирање туку уривање на хибридниот режим на ДУИ и СДСМ
Политичката партија Левица вели дека вечерашниот договор за формирање на ново мнозинство не значи и коалицирање.
-Денес на координативна средба политичките партии - Лeвица, ВМРО-ДПМНЕ, Алијанса, Алтернатива и Беса договорија пад на Владата на СДСМ-ДУИ. Конечно после 20 години ДУИ оди во опозиција! Со обезбедување на потребното мнозинство во Собранието на Република Македонија, загарантирано е распуштање на Владата преку гласање на недоверба - во случај Зоран Заев да не ја поднесе својата оставка. Овој договор, во ниеден случај, не значи коалицирање, и е со единствена цел - да се урне хибридниот режим на ДУИ и СДСМ, велат од Левица.
Според партијата, за идните избори претстојат понатамошни преговори.
-Левица и понатаму, односно и на идните парламентарни избори, ќе настапува самостојно - како единствен политички претставник на македонската угнетена класа. За идните избори и тоа кој и како ќе ги организира, претстојат понатамошни преговори во рамки на новото мнозинство, се вели во дописот.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа