Левица: За зградата што изгоре биле издвоени 80.000 евра за реконструкција во 2019 година

Иако измина една недела откако во пожар беа уништени канцелариите и архивата на Државниот инспекторат за животна средина поради несоодветна инсталација, сѐ уште нема никаква најава за одговорност на надлежните кои го дозволиле пропустот. Ваквото ноншалантно однесување на институциите воопшто не изненадува, со оглед на тоа што целиот мандат на оваа Влада беше обележан со сомнителни уништувања на документација – започнувајќи од поплавата во поранешното СЈО до пожарот во Министерството за правда, како и пожарот во поранешниот Завод за урбанизам каде беше трајно уништена значајна документација за градот Скопје, обвинуваат од Левица.

„Скандалозното со пожарот на поранешната Комерцијална банка е фактот што се работи за објекти чие одржување е во надлежност на Службата за општи и заеднички работи при Владата. Изјавата на директорот Пеце Мирчески дека Службата не е надлежна за тековно одржување на административните простории е еклатантен обид за прикривање на неговото неодговорно работење, со оглед на тоа што минатата година, во месец јануари издвоени се пет милиони денари за реконструкција на овој објект каде се сместени просториите на МИА, Секретаријатот за европски прашања и Државниот инспекторат за животна средина.

За реализација на оваа програма надлежна е токму Службата за општи и заеднички работи чиј директор Мирчески не бил ни запознаен дали канцелариите имаат исправна хидрантна мрежа, поради што беше причинета поголема материјална штета и уништена документација на Инспекторатот.

Очекуваме надлежните органи во наредниов период ажурно да реагираат и да го испитаат работењето на директорот Мирчески, со истата експедитивност како што реагираат за напишани статуси на фејсбук.” – се наведува во реакцијата на парламентарната партија Левица.

 

 

 

Добивајте вести на Viber

18.09.2020 - 12:41

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега