Мицкоски: Поскапување на струјата ќе има зашто владата ги краде граѓаните
Претседателот на ВМРО-ДПМНЕ, Христијан Мицкоски денеска беше во Битола од каде што порача дека поскапувње на струјата ќе има затоа што Владата ги краде парите на граѓаните.
„Поскапувањето на струјата ќе биде зашто крадат. Не работат, туку крадат. Е затоа ќе има поскапување на струјата. И затоа реков дека тие капитулираа пред енергетската криза. Често ми го поставуваат тоа прашање, добро што требаше да направат. Многу едноставно, требаше да ги подготват акумулациите, да има доволно вода во акумулациите и плански да ги трошат. Требаше да ги подготват ископите во рудниците за да има откриен доволно јаглен пет години однапред. Или пак потенцијал за да се открие јаглен пет години однапред. Требаше да продолжат со модернизацијата, требаше да направат ремонт на производните постројки. И така подготвени тие производни постројки ќе произведуваа еве не мора како што сме правеле некогаш 6 ипол или 6.600, 6.700 терават часови електрична енергија. Еве 5 нека произведуваат. Тоа е за 80% повеќе од тоа што го произведува ЕСМ сега или поранешно ЕЛЕМ, а тоа е некаде околу 3 терават на час.“, појасни претседателот на ВМРО-ДПМНЕ, проф. д-р. Христијан Мицкоски од Битола во рамките на активноста „Промените се случуваат, секогаш со народот“.
Мицкоски додаде дека ако власта произведеше 5 терават на час, тогаш ќе имаше два милиони мегават часови повеќе.
„ Замислете ако они произведоа 5 терават на час, тоа е два милиони мегават часови . Ако на берзите цената сега е 250 евра, тоа се половина милијарда евра плус. Половина милијарда евра повеќе за граѓаните, половина милијарда евра повеќе за компаниите, и колку толку ќе им помогне во енергетската криза и немаше од буџетот сега да трансферираме средства за да ја спасиме ликвидноста на денешно ЕСМ, поранешно ЕЛЕМ“, истакна Мицкоски.
Мицкоски додаде ако власта размислуваше за доброто на граѓаните и произведеше доволно електрична енергија, тогаш половина милијарда евра ќе останеа во буџетот и ќе имаше пари и за капитални проекти, за повисоки плати, за реформи.
„Но, за жал некој наместо да работи, тој краде. И затоа струјата ќе поскапи. Јас говорев уште од 2018-та година дека до ова ќе дојде. Енергетиката не е купи ден, продај, и не служи за дневно политички цели. Во енергетиката се планира пет или десет година однапред“, заклучи Мицкоски.
Мицкоски укажа дека за жал власта наместо да мисли однапред во енергетиката, таа единствено ги брои багерите со регистарски таблици во еден град од југоисточна Македонија. И годината за жал наместо да трае 365 дена, таа трае 450-500 дена според доставените фактури.
03.06.2022 - 14:04
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
