Мицкоски: ВМРО е симболот на Македонското единство - да ги негуваме солидарноста, еднаквоста и правдата

Претседателот на ВМРО-ДПМНЕ Христијан Мицкоски испрати честитка по повод денот на ВМРО – 23 Октомври. Вели дека ВМРО е симбол на македонското единство.

-ВМРО ги опфатило сите напредни и прогресивни елементи во македонското општество, целата Македонска интелигенција, стопанствениците и работливите Македонски селани. Сите тие заедно ја почнаа борбата која резултираше со Илинден 1903, а кулминираше со Илинден 1944. ВМРО е симболот на Македонското единство. Под знамето за слобода се обединети сите и Македонци, Албанци, Турци, Роми, Срби, Власи, сите кои сакале слободна Македонија, да бидат свои на своето. Таа нивна мисла била многу напред во тоа време бидејќи се темелела на принципите на солидарност, еднаквост, правда, правичност, се вели во честитката од Мицкоски.

Вели дека државата сега има огромна мисија, да се унапреди слободата.

-Нивната пожртвуваност тогаш е нашата слобода денес. Да го вреднуваме тоа, да не дозволиме нивната жртва да биде залудна. Имаме огромна мисија да ја унапредуваме таа слобода, и да ја негуваме солидарноста, еднаквоста и правдата. Економски да ја развиваме нашата земја, да рушиме бариери и ѕидови кои раздвојуваат. ВМРО обединувало. ВМРО му припаѓа на народот. Нека е за многу години Денот на Македонската револуционерна борба. Честит празник Македонијо, вели Мицкоски.