Митева: На пациентката во Струга и е извадена матката, јајник и бубрег, а за Филипче се е согласно стандардите

Стручниот надзор на Лекарската комора спроведен за гинекологот и директорот на струшката болница, покажале дека немало пропуст во лекарската интервенција кога на родилката и беа отстранети матката, бубрегот и јајникот, ова денеска преку коментар на денот го истакна Марија Митева од ВМРО-ДМНЕ.

-Човекот кој едвај може да се нарече министер, а уште помалку министер за здравство само ладнокрвно ја потврди ваквата информација. Од Лекарската комора наведуваат дека од моментот на приемот до моментот на исписот пациентката е третирана согласно постоечките медицински норми и стандарди. Па, би било сосема легитимно да прашаме дали според вас постоечките медицински норми и стандарди всушност значат сторување на тешки дела против здравјето на луѓето каде родилка оди на породување, а заминува без три органи? На 10 Февруари кажав дека ова ќе бидат дела за кои ќе слушнеме само дека истрагата е започната, одговорноста можеби ќе се лоцира само врз извршителите, а директно одговорните за спречување на вакви дела ќе ги гледаме како ладнокрвно ни велат „да го почекаме извештајот”. Сум погрешила само за едно нешто, кога сум споменала дека одговорноста МОЖЕБИ ќе се лоцира, вели Митева.

Таа додава дека не, од оваа влада и овој министер за здравство одговорност никогаш нема да видиме. Ниту морална, ниту кривична, а најмалку од се политичка одговорност!

-Ќе ве потсетам дека на 3 ноември 2020 година кажав дека Венко има 1.000 причини зошто, 1.000 причини затоа за ОСТАВКА! Денес, после сите овие порази, после целиот хаос во здравството почнувајќи од скандалозните случувања со пациентите па се до најлошото менаџирање на пандемијата, после над 3000 изгубени човечки животи и немањето вакцини, веќе има милион и една причина, потенцира Митева.