Напад на ајкула во Египет остави 12-годишно момче без рака и туристички водич без нога

Во напад на ајкула во египетското одморалиште Шарм ел-Шеик на Црвено море, дете од Украина останало без рака, а локален туристички водич без нога, изјавиле денеска локалните власти.

Нападот на ајкулата се случил во неделата додека двајца туристи, мајка и син, и нивниот водич, нуркале во националниот парк Рас Мохамед, навеле властите на Египет.

Повредените се сместени во болница, а со истрагата е утврдено дека ги нападнала океанска белоперка, долга околу два метри.

Египетските власти не изнеле детали за повредите, додека украинските навеле дека 12-годишник е на одделение за интензивна нега и дека лекарите не успеале да му ја спасат раката.

Мајката на детето се здобила со полесни повреди.

Властите ја затвориле областа на националниот парк каде се случил нападот.