Ветените проекти приоритет за Владата

Ние првенствено сме фокусирани на реализација на проектите. Тоа е нашиот поттик, бидејќи заради тоа ја добивме довербата. Ние сме секогаш за дијалог, добро е да се вратат во институциите, но дијалогот да биде на принципиелни основи, да не се поставуваат барања кои практично ќе ја доведат во прашање демократијата и изразувањето на слободната волја нa граѓаните на избори.

Ова е ставот на министерот за здравство Никола Тодоров искажан при гостувањето во вестите на Алфа телевизија, одговорајќи на прашањето дали е оптимист дека преговорите со опозицијата ќе отпочнат. Тодоров нагласи дека Македонија имала слободни и фер избори на кои владејачката гарнитура добила сериозно мнозинство, добила доверба да ги спроведе проектите кои се ветени во програмата.

-Главните приоритети на Владата се поврзани со главните проблеми на граѓаните. Најголемиот фокус секако е на економијата и на отворање нови работни места. Податоците генерално покажуваат дека постигнавме одличен резултат. Во првиот семестар од годината постигнавме најдобар резултат во Европа, што сериозно е во фунција на подобрување на економската состојба, рече Тодоров.

Тој нагласи дека до крајот на годината извозот само од ТИРЗ-овите во Македонија ќе надмине износ од една милијарда евра, што е податок кој говори дека во Македонија се отворија фабрики кои што произведуваат и се извозно ориентирани

-Тоа е прилично различна ситуација од она што го имавме претходно кога не можеше да се наброи ниту една фабрика која што е отворена во Македонија како резултат на некоја странска инвестиција, рече Тодоров.

Зборувајќи за реализираните проекти во неговиот ресор, Тодоров рече дека во програмата биле ветени 79 проекти, од нив 9 се комплетно реализирани во првите 100 дена, 12 проекти се реализирани кои што воопшто не биле во програмата и 45 проекти се во тек на реализација или при крај на реализација.

-Се заврши комплетно реконструкцијата на поликлиниката Букурешт, комплетно се заврши реконструкцијата на здравствениот дом во Крива Паланка. Во финална фаза е отворањето на Центарот за спирална хирургија, како и инфраструктурниот зафат во делот на државната кардиохирургија. Исто така многу активно работиме и на двата капитални проекти, едниот е изградба на Клиничка болница во Штип, а вториот е Клиничкиот центар во Скопје, рече Тодоров.

Целосното гостување на министерот Тодоров во вестите на Алфа погледнете го во видеото...