Иванов на Спортски бон-тон во Маврово - Ростуше

Спортско културната манифестација во рамките на проектот „Традиционални спортски игри - Спортски бон-тон"  денеска се одржа на терените кај ски-центарот во Маврово. Целта на проектот е да се промовира Спортски бон-тон како модел на интегрирање на децата од школска возраст во системот на спортување, дружење, играње и нивно меѓусебно запознавање со нивните традиции, култури и обичаи.

Проектот се реализира преку спортско-културни манифестации во општините Велес, Карпош, Маврово-Ростуше, Ново Село, Охрид и во Свети Николе.

На денешната манифестација во Маврово присуствуваа претседателот на Република Македонија Ѓорге Иванов, координаторот на проектот Иван Атанасоски и градоначалникот на општината Маврово-Ростуше, Мукрем Мехмеди.

- Сакаме децата преку спорт да ги социјализираме и во нив да го поттикнеме тимскиот и колективен дух, рече  Атанасоски и додаде дека преку дружењето на децата треба да се зачуваат игрите од нашите постари.

Градоначалникот Мехмеди рече со денешното дружење децата ги потсетиле повозрасните на игрите кои ги играле како деца. - Истовремено преку овие игри децата ги оддлечува од компјутерите на сметка на дружење во природа, додаде Мехмеди.

„Традиционалните спортски игри - Спортски бон-тон" се одржуваат под покровителство на претседателот на Македонија Ѓорге Иванов, а со поддршка од американската амбасада во Македонија.