Одржана првата проба во новата театарска зграда во Велес

Комедијата „Најважната работа на светот“  денеска ја доживеа својата прва проба во новата зграда на Народниот театар „Јордан Хаџи Константинов-Џинот“ во Велес. Претставата е по текст на Братислав Димитров, а е во режија на Љубиша Георгиевски.

Во претставата игра комплетната актерска екипа на велешкиот театар, а гости во претставата се Благоја Чоревски и Ирена Ристиќ, додека пак костимите се изработка на Невена Георгиевска, а сценографијата е на Валентин Светозарев.

Јордан Витанов директор на велешкиот театар на денешната прес- конференција изрази надеж дека оваа прва проба ќе остане долго во сеќавање, а премиерата, информира, се очекува да се случи во декември годинава.

Авторот на текстот Братислав Димитров изјави дека е среќен што третпат работи во овој театар кој, според него, има навистина гурмански апетит за правење претстави.

- Среќен сум што и мојот професор Љубиша Георгиевски го режира овој текст, особено заради неговата навистина свежа, луцидна, радикална концепција, рече Братислав Димитров.