ВМРО-ДПМНЕ: Набавката на вагоните во корист на граѓаните и државата

Пратеничката група на ВМРО-ДПМНЕ денеска даде поддршка на дополнувањата на предлог законските решенија со кои ќе се овозможи набавката на патнички и товарни вагони.

Пратеникот Сашо Аќимоски на прес-конференција рече дека ги поддржуваат предлог законите за гаранција на Република Македонија преку кој ќе се изврши набавка на четири дизел-моторни триделни патнички гарнитури и две електро-моторни триделни патнички гарнитури, како и рехабилитација на осум електро локомотиви и набавка на 150 товарни вагони.

- Првиот дел од набавката на патничките гарнитури се планирани да пристигнат во април оваа година, а со останатиот дел кои ќе пристигнат ќе се реализира возобновување на возниот парк за 60 проценти. Реализацијата на овој капитален проект ќе овозможи значителен напредок и зголемување на конкурентноста и профитабилноста на Македонските железници за што подобро позиционирање и опстанок на ова претпријатие на домашниот и меѓународниот пазар, оцени Аќимоски.

Според него, со набавката на новите патнички гарнитури ќе се подобри и квалитетот и безбедноста на овој тип на превоз, а со новите 150 товарни вагони ќе се создаат поволни услови и насочување на македонската економија кон меѓународниот глобален пазар, поттикнување на нови инвестици и зголемување на трговската размена со други земји.