Малезија се запозна со бизнис капацитетите на Македонија

Денеска во Малезија беа презентирани можностите за инвестирање и водење бизнис во Македонија. Со капацитетите на Македонија се запознаа компаниите членки на најголемата стопанската комора во оваа земја.

 Од Агенцијата за странски инвестиции и промоција на извозот информираат дека се остварени средби со угледни компании на кои се разгледани можностите за организирање бизнис форум на малезиски компании во Македонија.

 - Релативно непознатиот пазар од овој регион исто така може да биде добра шанса за извоз на македонски производи. Посветуваме големо внимание на промоција на Македонија во Малезија и овој регион, се со цел добро да ги искористиме сите можности за инвестирање и промоција на извозот, изјави директорот на Агенцијата за странски инвестиции и промоција на извозот, Висар Фида.

 Во април годинава во Малезија беше остварена средба на директорот на Агенцијата за странски инвестиции и македонскиот промотор Тони Атанасовски со претставници на оваа малезиска комора.

 Малезија, како и другите земји членки на ASEAN, имаат капацитет за инвестирање надвор од регионот, а како посебно таргетирани се компаниите кои веќе имаат потреба од проширување на постоечките капацитети и имаат постоечка соработка и извоз во Европската Унија.