Без калкулации, за гордоста се работи

Попладнево во Доха ќе заврши групната фаза од Мундијалот во Катар, а Македонија игра против Австрија.

Во досегашниот тек од Светското првенство Македонија забележа три победи, против Тунис, Иран и БиХ, додека во четвртото коло забележа пораз од најдобрата селекција во оваа група, Хрватска.

Токму „коцкестите“ ќе завршат на првото место на табелата, а ние попладнево одлучуваме дали ќе бидеме веднаш зад нив или ќе мора да се задоволиме со третото место.

Пласманот во осминафиналето е обезбеден по трите победи во низа, но желбите се со победа да се заврши првата фаза и секако да се освои второто место на табелата.

Во однос на денешниот противник нашата репрезентација има бод повеќе, па во борбата за второто место на Македонија и одговара и нерешен резултат. Сепак, Македонија не знае да калкулира, нашите ракометари на секој натпревар влегуваат со победа во мислите. Впрочем такви најави стигнуваат и од Доха, дека иако е потрбен само еден бод за да се осигура второто место, сепак нема да има калкулирање, напротив ќе се брка третата победа во пресметките со Австрија.

Најискусниот, најдобриот и лидерот во нашиот тим Кире Лазаров вели дека Македонија е фаворит и од таа улога не смее да се бега бидејќи во моментов сме далеку подобри од Австрија.

-Немаме ниту една причина да бидеме со наведнати глави, напротив, имаме одличен резултат од три победи и еден пораз, резултат кој во Доха го остварија само мал број на репрезентации. Од селекцијата на Австрија сме многу подобри и нема зошто да бегаме од улогата на фаворит. Уште повеќе, посакувам и победа со поголема разлика и со четврта победа да го освоиме второто место. Мал хендикеп е повредата на Јоновски, кој е столб во нашата одбрана. Но, познавајќи го Јоновски, знам дека тој ќе стисне заби и ќе ни помогне, вели Кире Лазаров.

Македонија и Австрија имаат три меѓусебни пресметки, а традицијата е на наша страна. Две победи и еден пораз имаме во дуелите со денешниот противник.

Минатата година на ЕП во Данска нашите ракометари славеа со 22:21, додека во квалификациите за СП во 2013-та во Шпанија, двете селекции забележаа по една победа.

Почетокот на натпреварот е во 17 часот, а претходно ќе биде завршен и дуелот од А група Шпанија – Словенија, по што ќе биде и познат ривалот на Македонија во осминафиналето.

Двојки 5. коло

Група Б: Македонија – Австрија, Тунис - Иран, Хрватска – Босна и Херцеговина.

Табела: Хрватска 8, Македонија 6, Австрија 5, Тунис 3, БиХ 2, Иран 0.

Група А: Бразил – Чиле, Словенија – Шпанија, Катар – Белорусија.

Табела: Шпанија 8, Катар 6, Словенија 6, Белорусија 2, Бразил 2, Чиле 0.