Вардар ја совлада Војводина

Ракометарите на Вардар очекувано, беа подобри од Војводина во дуел од 18.коло на регионалната СЕХА лига.

Македонскиот вицепрвак ја потврди улогата на фаворит и до дванаесеттата победа во СЕХА лигата стигна со триумфот над Војводина со 30:26.

Гостите од Нови Сад беа рамноправен противник се до 17-минута кога резултатот беше израмнет 8:8, по што следуваше серија на Вардар од 3:0 и за прв пат три гола предност 11:8 во 21-минута. На полувремето Вардар замина со предност од два гола 15:13.

Во вториот дел, црвено-црните рутирано ја одржуваа предноста, на моменти и зголемуваа, за на крајот забележаа победа со конечни 30:26 .

Најефикасен во редовите на Вардар беше Стефан Терзиќ кој постигна 5 гола, додека Сергеј Горбок и Немања Прибак придодадоа по 4 голови.

Покрај овој натпревар попладнево се одигра и средбата меѓу Вестпрем и Борац, кој го доби унгарскиот шампион со 32:18 остварувајќи ја 15-тата победа во исто толку одиграни натпревари во СЕХА конкуренцијата.

Следен натпревар за Вардар е гостувањето кај Татран Прешов на 28 февруари.

Табела: Вестпрем 45 бода, Вардар 36, Загреб 27, Татран Прешов 27, Мешков Брест 27, Металург 15, Нексе 10, Војводина 7, Раднички 7, Борац 4.