Груевски со своја бомба денеска

Најмалку 400 нови вработувања во следните четири години најави британската ИКТ компанија „Ендава“ која денеска отвори нови канцеларии во Скопје со што и официјално почна со работа.

Како што рече извршниот директор Џон Котерел, тимот во Скопје засега брои 36 членови, но во следните 12 месеци ќе достигне 100 лица.

- Брзиот економски раст, уште поинтензивниот развој на информатичкиот сектор и високообразовниот кадар беа клучните причини поради кои го одбравме Скопје меѓу 40 други градови. Нашата цел е да ги привлечеме најдобрите од оваа област, тие во нас да препознаат нешто каде што ќе ја изградат својата кариера, истакна Котерел.

Изразувајќи задоволство што уште еден странски инвеститор почнува со работа во Македонија, премиерот Никола Груевски нагласи дека ваквите настани се нов импулс за владините тимови во постојаните промоции на поволните деловни можности на земјата.

- Македонија е позната како еден од најбрзорастечките пазари во ИКТ секторот во овој дел од Европа. Таквиот тренд се должи на нашите политики и мерки за развој во изминатите години, поттикнувањето на младите да е образуваат во делот на информатичките науки, отворањето нови факултети,... Ваквите прилики, но и добрите бизнис услови што ги нуди Македонија, се основните причини поради кои светски познатиот бренд „Ендава“ реши да го прошири своето производство токму тука, истакна премиерот Груевски.

Според него, користењето врвна технологија и софтвер на „Ендава“ кај голем број моќни мултинационални компании во секторите банкарство, осигурување, малопродажба, телекомуникации, медиуми, издаваштво, ќе значи дополнително подобрување на имиџот на Македонија.

Канцелариите на „Ендава“ се наоѓаат во престижната зграда „Кале“ и за нивно изнајмување компанијата потпиша петгодишен договор. Просторот зафаќа 3.000 метри квадратни, а е дизајниран и уреден согласно највисоките светски стандарди во ИКТ индустријата. Има 19 сали за состаноци, делови за релаксација, оддел со игри и простор во кој вработените можат да се дружат. Ваквиот концепт, како што посочи извршниот директор, целосно се вклопува во културата на „Ендава“ што подразбира овозможување одлична работна атмосфера.

Наспроти бомбите кои СДСМ ги најавува, Груевски уште во ноември најави дека и тие спремаат бомба, ама позитивна,

-Заев отсекогаш се заканувал, нека продолжи да се заканува. Ние работиме друг тип на бомби. Еве спремаме една бомбичка, но позитивна со која ќе решиме долгогодишен проблем на илјадници луѓе во Македонија. Тоа планираме наскоро да го објавиме. Ние имаме позитивен приод кон решавање на проблемите, кон реформи, кон помагање на луѓето. Тие се заглавени во друга сфера во негативним кампањи, манипулации, рече Груевски во ноември гостувајќи во Дневникот на ТВ Сител

Тој додаде: Ние ќе тераме по наше, тие по нивни, па народот нека пресуди.

Вчера владата објави информација дека ќе овозможи вработување на неопределено време за 3000 лица кои работат како хонорарци или пак се враобтени на определено време.