ФОТО: Основното училиште во Берово ќе добие нови спортски терени
Со средства од општинскиот буџет и наменски дотации од Министерството за образование и наука почна реконструкцијата на спортските терени на Општинското основно училиште „Дедо Ило Малешевски“, пренесува МИА.
Реконструкцијата опфаќа асфалтирање на постојаното повеќенаменско игралиште во површина од 1.050 метри квадратни со дебелина на асфалтниот слој од шест сантиметри. Со проектот за реконструкција е предвидена и изградба на патеки и ограда околу игралиштето.
- Игралиштето на ООУ „Дедо Ило Малешевски“ е лоцирано до училишната зграда во центарот на градот и основна намена е да се користи за изведување настава по физичко воспитание. Во рамки на реконструкцијата ќе биде инсталирано и соодветно осветлување, со што ќе се овозможи користење на спортските терени и во вечерните часови, вели градоначалникот на општина Берово, Драги Наџински.
Покрај учениците, игралиштето ќе можат да го користат младите и постарите граѓани, како и туристите што особено во летниот период го посетуваат Берово.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
