Нова инвестиција на домашната компанија „Брако“ од 4,2 милиони евра
Опрема и нова хала со вредност од 4,2 милиони евра, како и педесет нови вработувања е последната инвестиција во велешката компанија Брако. Инвестициската програма ќе биде реализирана во текот на следните девет месеци, а е предвидено да биде изградена хала од 5.100 квадратни метри и набавка на соодветна опрема.
- Ова несомнено е голем дел од нашата развојна програма со која што имаме за цел зголемување на асортиманот и портфолиото и со тоа проширување на пазарите за пласман на нашите производи. Наше цврсто убедување е дека со инвестирање и вложување во развојот на компанијата, треба да се оди во континуитет без оглед на социо-економските показатели. Минатата година почнавме со производство и извоз на првиот македонски камион што се покажа како многу успешен чекор и забрзано ги освојуваме странските пазари, изјави претседателот на Бордот на директори Кочо Анѓушев, кој додава дека оваа инвестиција е одговор на зголемените барања за нашата компанија, како и подобрување на организацијата и менаџментот на производството.
Со новата опрема, од компанијата очекуваат да одговорат на производните стандарди на европските пазари.
Како специјализирана компанија за производство на жичени и ламаринени-цевкасти производи, медицинските помагала и производи поврзани со телекомуникациската опрема, Брако 96 проценти од целосното производство го извезува во 19 држави. Брако во моментов има 450 вработени во Велес и 70 во Панчево, а за првите девет месеци од оваа година има зголемен промет за 13 проценти споредбено со минатата година со производство на 30.000 тони финални производи.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа