Најпродаваните цигари во Македонија веќе се поскапи - од утре поскапуваат цигарите

Винстон, Монте Карло, Камел и ЛД се цигарите кои од утре нема да поскапат и покрај тоа што ќе се зголеми акцизата. Од компанијата Балкан велат дека засега не размислуваат за нагорна корекција на цените и дека ќе почекаат да видат како ќе се постави конкуренцијата.
Прилепскиот тутунски комбинат кој ги произведува едни од најпродаваните цигари во Македонија, Родео и Бренд веќе ги зголеми цените. Повеќе од еден месец, цигарите Родео во зависност од видот и пакувањето се продаваат за 3 до 4 денари поскапо по кутија.
Останатите компании се уште не излегле со информација како ќе одговорат на новото покачување на акцизата за цигарите.

Согласно календарот за зголемување на акцизата за цигари, од први јули 2015 година е предвидено поскапување од три денари за кутија цигари.

Новата, повисока цена во продавниците на Македонија треба да почне да се применува на стартот од летото доколку производителите не решат тие да ја компензираат.

Зголемување од по 3 денари на цигарите се предвидува се до први јули 2016 година, по што во наредните седум години тие ќе поскапуваат по четири денари за кутија годишно.

Ваквиот тренд на покачување за осум години драстично ќе ги поскапи цигарите во земјава, па така најскапата кутија цигари која денес чини 120 денари, за осум години ќе достигне цена од 154 денари.