Се повеќе луѓе градскиот живот го менуваат со селски
Од 4.600 села во Србија, 986 имаат помалку од 100 жители. Одењето на луѓето од село во град е тренд кој трае со децении.
Екипата на Ал Џезира посети семејство кое тргнало во обратен правец, го напуштиле градот и се преселиле на село.
Секој дел од имотот го уредиле сами. Ги напуштиле работните места во градот и со децата животот го продолжиле на село. Велат дека се среќни поради тоа.
- Да сум знаел, по една година кога видов како е да се живее на село, зажалив што тоа не го направив пред 20 години бидејќи можеби би бил уште поопуштен, понормален и веројатно помалку би се лекувал отколку во градот, условно кажано од таа некоја урбана приказна – вели Горан Милојевиќ, жител на селото Пајсијевиќ.
Без стрес
- Тука немаш стрес, тука немаш ништо. Децата растат сосема нормално, се дружиме со сите можни животни, од гуштери до змии. Живееме во допир со природата – додава Цеца Тешиќ Милојевиќ.
Малкумина се тие во Србија кои, како семејството Милојевиќ, градскиот живот го замениле со селски. Одгледуваат се што им треба, а едни се од ретките кои имаат дрво Павловнија, познато како Царско или Павлово дрво. Велат исклучително е квалитетно. По неколку години може да се користи како огревно дрво или во индустрија за мебел.
- Дрвото по втората година може да достигне висина и до четири метри. Семејството Милојевиќ оваа година одгледале над 4.000 дрвја. Ги продаваат главно на саеми, а цената за една садница е едно евро – јави репортерот на Ал Џезира, Зоран Косановиќ.
Богатство од животот на село
Со доаѓањето на село семејството Милојевиќ на свој начин го враќа долгот на природата.
- Јас толку многу дрвја произведов што сега дишеме, јас и вие на сметка на она што сам го посадив. Сигурно на природата се оддолживме за тој кислород што сме го потрошиле во животот. Сигурно, ако не и повеќе – вели Горан Милојевиќ.
- Тоа што ви донесува селото, тоа е немерливо. Нема со што да се измери. Тоа што јас ќе запалам оган, тоа е супер. Не зависам од тоа дали ќе ми го исклучат греењето или не. Значи, ништо не ми е проблем – додава Цеца Тешиќ Милојевиќ.
Сепак, во Србија е проблем што се помалку луѓе живеат на село, па така ресурсите и богатството на природата остануваат неискористени, а селата изумираат.
Проценки се дека околу 4.500 села во оваа земја, во речиси секое четврто се помалку од 100 жители.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа