Премиерот Груевски постави камен темелник за новата зграда на АДСДП

Камен темелник за изградба на новата зграда за АД за стопанисување со станбен и деловен простор беше поставен денес, на кој присуствуваа премиерот Никола Груевски и директорот на акционерското друштво, Цветко Грозданов.

Премиерот истакна дека Владата продолжува со инвестиции во насока на долгорочно сместување на институциите во свои објекти, со што ќе се намалат трошоците за кирии.

-Со ова се става крај на несоодветните просторни  услови во кои со децении работеа вработените во акционерското друштво за стопанисување со станбен и деловен простор. Значително ќе се подобрат условите за работа на 180 вработени. Изградбата ќе трае околу 2 години и е предвидено зградата да биде готова до крајот на 2017 година, истакна Груевски.

Тој додаде дека со изградбата на вакви објекти се заштедуваат буџетски средства, бидејќи не се плаќаат кирии, а истите се енергетски ефикасни.

Самата зграда дополнително ќе остварува и приходи, бидејќи дел од просториите ќе бидат дадени под наем.

Директорот Грозданов истакна дека новата зграда ќе се протега на површина од 1547 метри квадратни.

-Новите простории на АД за стопанисување со станбен и деловен простор ќе бидат сместени во зграда на 6 ката и приземје со површина од 6400 метри квадратни и 9 деловни простории, потенцираше Грозданов.

Изградбата на новата зграда, во која  ќе биде сместено акционерското друштво за стопанисување со станбен и деловен простор, а која се наоѓа во близина на Министерството за надворешни работи, ќе чини 519 милиони денари.