ЈЗУ Општа болница Охрид: Се вложуваат напори за подобрување на здравствените услуги
Поттикнати од, како што велат, некои медиумски оцрнувања на лекарската фела и Македонското здравство, од ЈЗУ општа болница Охрид испраќаат соопштение во врска со сите случувања во здравството.
-Имено како компетентни во здравствената проблематика и политика во Охрид, можеме да кажеме дека максимално од страна на Владата на Македонија и Министерството за здравство на Р.Македонија, се вложуваат напори за квалитетен исчекор во подобрување на здравствените услуги и доближување до европското здравство. Во охридската болница во период од 2006 година па се до денес има доживеано драстично позитивни промени во набавувањето на медицинска опрема и подобрување на здравствените услуги на пациентите. Во овој период се изгради најсовремен хируршки блок со европски стандарди и истиот се опреми со врвна технологија, која изнесува преку 4 милиони евра и исто така во овој блок од неговото отварање од мај 2013 година, па се до месец јуни 2015 година се згрижени, 89.594 амбулански пациенти и 6.817 болнички пациенти, се вели во соопштението од охридската болница.
Оттаму додаваат дека во делот на дијагностиката на болести се набавени најдобрите медицински апарати во вредност околу 2 милиони евра, како што се комјутерски томограф, мамограф, 4Д гинеколошки ултразвук, 4Д кардиолошки улатрзвук, офтамолошки ласер, ендоскоп, лапараскоп, колоноскоп и др.
-Во доменот на организацијата и подобрувањето на здравствените услуги се воведоа нови медицински методи и технологии во работењето со пациентите како што се системот Мој термин, сето тоа регулирано правно, во интегриран информатички здравствен систем, едукација и доедукација на здравствените работници и соработници, на кои им се овозможи проширување на нивните знаења, кај нас и во светот и воведување на нови методи во лекувањето на пациентите. За подобрување на здравствените услуги Министерството за здравство на Р.Македонија овозможи вработувања на стручен медицински персонал: 23 доктори, 10 здравствени соработници, 27 сестри и 80 помошен персонал, додаваат од болницата.
Сите овие вложувања во здравството и сите овие здравствени политики имаат за цел, да им се олесни лекувањето, да се скратат патувањата до другите здравствени организации и исто така да се скратат дополнителните материјални трошоци на пациентите, велат од болницата, а на лекарите им се овозможи побезбедно практикување во давањето на здравствените услуги, во осовременувањето на медицинската практика, базирана на медицински патеки и протоколи.
Кога ќе ги земеме во предвид сите вложувања кои досега се превземени, додаваат од охридската болница, неможеме да се сложиме дека здравството е на маргините на општеството и ги охрабруваме Владата на Р.Македонија и Министерството за здравство на Р.Македонија да продолжат со посветена работа во развојот на здравствениот систем во Р. Македонија.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа