Радовишани ги дадоа своите идеи за новата програма на ВМРО-ДПМНЕ

Како резултат на барањата и идеите на граѓаните досега се реализирани многу проекти во сите градови во Македонија.

Градоначалникот на општината Сашко Николов истакна дека праксата која ВМРО-ДПМНЕ како партија ја воведе со давање идеи од граѓаните се покажа како многу успешна со тоа што од претходните програми голем дел од идеите на граѓаните се реализираа.

-Граѓаните знаат дека со нас се на сигурно, знаат дека дадените ветувања ги исполнуваме и ги реализираме планираните проекти. Ги почитуваме граѓаните и нивното мислење. И ги вградуваме во партиската програма нивните идеи, од кои како производ во Радовиш се реализирани повеќе проекти и во населените места и во градот. На пример: хортикултурно уредување на булеварот Александар Македонски, реконструкцијата на стариот мост во Радовиш и други, истакна Николов.

Градоначалникот посочи дека во тек се многу проекти кои ќе го подобрат животот на граѓаните во Радовиш.

-Започна градбата на пешачката патека од с. Ораовица до манастирот Свети Георѓи Великомаченик, потоа отпочнуваме со изградба на локалниот пат помеѓу Подареш и Калуѓерица, во тек е изградба на основно училиште во с.Покрајчево, и кон крајот на ова недела отпочнуваме со реализација на два најгорливи проблеми за жителите на населените места Калуѓерица и Воиславци, а тоа е изградбата на канализациона мрежа во овие две населени места. И во целост да опстоиме на ветениот збор и да го оправдаме дадениот глас за нас како политичка партија ВМРО-ДПМНЕ, рече Николов.

Драги Миленков, претседателот на ОК на ВМРО-ДПМНЕ истакна дека програмата која ја пишуваат народот и експертите ќе биде новиот успех на претстојните избори година кои треба да бидат одржани во месец април следната година.