Македонија првпат се претставува пред унгарските туристи
Агенцијата за промоција и поддршка на туризмот првпат ги претставува македонската култура, историја и природните богатства пред унгарските туристи, на Саемот за туризам во Будимпешта.
Како што соопшти Агенцијата, Саемот, помогнат од кинеските туристички власти кои донесоа голем број кинески тур-оператори заинтересирани за кружни тури на Балканот, во овие четири дена, од 3 до 6-ти март, очекува посета на преку 40.000 потенцијални партнери.
- Ова претставување е одлична можност за промоција на Македонија како дестинација за туризам на европската мапа. Посебна шанса претставува и промоцијата на Македонија пред кинеските туроператори, изјави амбасадорот на Република Македонија во Унгарија Игор Есмеров.
На Саемот се одржа бизнис работилница на која Македонија оствари средби со неколку кинески туроператори: Leo Vacations, Oases Travel, Tour Nasdaq,Beijing Youth Travel Service и China International Travel Service. Од унгарските тур-оператори посебен интерес пројавија Robinson Travel, Theo Tours, Caterina Travel,Chemol Travel и Union Travel Agency.
Остварени се и повеќе состаноци со претставници на националните туристички организации на Србија, Војводина, Словенија, Хрватска, Албанија и Министерството за економија на Унгарија – сектор за туризам, при што се потенцираше потребата од заедничка соработка на балканските земји со цел претставување трети пазари и привлекување туристи од подалечните земји на балкански кружни тури во кои секоја земја ќе заземе посебно место.
На состанок и со Балинт Ердеи, претседател на Асоцијацијата на унгарски тур-оператори се разгледа можноста за соработка за претставување на балканските земји на кинескиот пазар.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа