Почнува со работа: Проверете колку чини билетот за лифетот за движење по краците на Милениумскиот крст

Педесет денари за возење со лифтот на Милениумскиот крст на Водно е цената која ја предлага ЈСП "Скопје" и за која зелено светло треба да дадат градските советници на денешната седница. Оваа цена би важела за возрасни и за деца до 14 години, за деца од 6 до 14 години билетот би чинел 20 денари, а за помладите од 6 години се планира бесплатно возење, пишува Вест.
"За комбиниран превоз со жичницата и со лифтот цената на билетот за возрасни и за деца до 14 години ќе биде 130 денари, додека за деца од 6 до 14 година 60 денари", се вели во образложението на ЈСП "Скопје" до советниците.
Според најавите од претпријатието, лифтот треба да почне со работа најдоцна за еден месец. Тој веќе е монтиран и во моментов се вршат последните подготовки за негово пробно пуштање во употреба наредниот месец. Лифтот е набавен од Франција и чини околу 300.000 евра. Ќе биде со капацитет за 10 лица, а возењето ќе трае околу една минута. Дел од турата предвидува и движење на посетителите по краците на крстот, во присуство на едно лице вработено на крстот кое ќе ги проследува.
На врвот на Водно се работи и на изградбата на пречистителната станица и се копаат бунарите за вода. Според надлежните, просторот околу крстот треба да биде комплетно уреден за два месеци.