Претседателот Иванов се налути и ја пречкрта референцата ПЈРМ: Сам го реши проблемот во Истанбул

Претседателот Ѓорѓе Иванов вчера беше на Гала вечера која во чест на светските лидери ја приредил турскиот претседател Ердоган, во рамки на Самитот во Истанбул. Референцата ПЈРМ кај турските домаќини и кај македонската делегација за време на Гала вечерата предизвикала голема непријатност, којa ја решил лично претседателот Иванов. Откако домаќините увиделе дека Иванов на заедничката фамилијарна фотографија од самитот којшто e во организација на Обединетите нации, е заведен како "Претседател на ПЈРМ" тоа предизвикало непријатност, бидејќи и самите тие не очекувале такво нешто. Македонскиот претседател лично ја пречкртал привремената референца PJRM, под неа напишал Македонија и потоа го ставил својот потпис. Турските домаќини изразиле жалење за овaa непријатност и со аплауз го дочекале ваквиот гест на македонскиот претседател. Поддршка за неговиот непосреден пристап искажале и дел од присутните лидери. Претседателот Иванов престојува во работна посета на Република Турција, каде што учествува на Светскиот хуманитарен самит во Истанбул, во организација на Обединетите Нации.