Јолевски: Конкурсите за пилоти постојано се отворени

Почнуваме со нов конкурс за 90 професионални војници и 25 лица со високо образование со специфична струка потребна на Армијата, како лекари, психолози и инженери, а денеска првата група од 125 професионални војници за оваа година стапи на должност, изјави за ТВ Нова министерот за одбрана, Зоран Јолевски.

-Добрите војници се услов за успех на секоја армија. Конкурсот заврши, а 48 од 125-те војници го завршија и 24-дневниот селективен курс и ќе бидат дел од специјалните единици, додека останатите ќе ги пополнат другите единици на Армијата, изјави Јолевски.

Во рамките на Министерството за одбрана, додава Јовевски, постои школа за пилоти, која е една од најквалитетните во Европа.

-Постојано се обучуваат пилоти за потребите како за армијата на Македонија, така и за другите државни институции, како МВР. Конкурсите се перманентно отворени, а обуките се спроведуваат два пати годишно. Обуките траат три семестара, 18 месеци, а право на пријавување имаат сите граѓани на Македонија, помлади од 27 години, кои имаат завршено факултет и познаваат англиски јазик, изјави Јолевски.

Тој додава дека пред два месеца донесена е одлука за зголемување на дневниците на специјалците за 30 проценти.

-Министерството има средства за дневниците, истите редовно се исплаќаат. Нормално можно е да има технички грешки па да не се исплатат навреме на некои лица, поради нецелосните или ненавремено пристигнување со списоците, а бидејќи средствата се исплаќаат на трансакциски сметки. Но, уверувам дека министерството располага со буџет доволен за да се покријат сите трошоци, вели министерот Јолевски.