Пахор: Македонија и Грција да го применат искуството на Хрватска и Словенија
Македонија и Грција можат да го применат искуството на Словенија и Хрватска во решавањето на отворените билатерални прашања, изјави словенечкиот претседател Борут Пахор по средбата со еврокомесарот за проширување Јоханес Хан одржана на маргините од Генералното собрание на ОН во Њујорк.
- Словенија е пријател на Македонија и се обидува да и помогне, но притоа сме отворени и сметаме дека без компромис и прилагодување и од македонска и од грчка страна тоа не може да се постигне, изјавил Пахор за словенечките медиуми, пренесува Хина.
Соред него, неопходен е компромис, како и соработка од другите држави во регионот.
- Словенечко-хрватското искуство покажува дека се исплати да се преговара и да се бараат решенија, рекол Пахор алудирајќи на договорот што го постигнаа Љубљана и Загреб околу спорот за морската граница, по што Словенија ги деблокира преговорите на Хрватска за членство во ЕУ.
Пахор очекува напредок во дијалогот меѓу Македонија и Грција на конференцијата што треба наскоро да биде одржана во Скопје во рамки на „Процесот Брдо Бриони“.
- Словенија како пријателска држава и еден од иницијаторите на „Процесот Брдо Бриони“ е подготвена да помогне да се најдат решенија за отворените прашања, истакнал словенечкиот претседател Борут Пахор.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа