Општина Илинден изготвува „Стратегија за интегриран развој за периодот 2017-2021 година“

Општина Илинден во соработка со ОБСЕ-Мисијата во Скопје, отпочна со активности за реализација на проектот за изработка на „Стратегија за интегриран развој на Општина Илинден за периодот 2017-2021 година“.

Во таа насока во Домот на култура „Илинден“ се одржа правата работна средба за изготвување на новиот стратешки документ.

Работилницата ја отвори и ги поздрави присутните членови на работната група градоначалникот на општина Илинден, Жика Стојановски, кој ја искажа својата благодарност до мисијата на ОБСЕ во Скопје, за досегашната поддршка во изработка на претходните два стратешки документи за периодите 2006-2011 и 2012-2016 година како и својата верба дека и новата стратегија ќе придонесе за продолжување и интензивирање на економскиот развој на општина Илинден.

Вишиот офицер за демократско владеење на Мисијата на ОБСЕ во Скопје, Јанис Пилиурис, ја истакна поддршката која ОБСЕ континуирано ја спроведува на општина Илинден во делот на зајакнување и имплементација на принципите на демократија, инклузивност и одржливост.

Ова е првата работилница од вкупно петте планирани, преку кои работната група составена од претставници на јавниот, приватниот, невладиниот и граѓанскиот сектор, ќе ја изработат новата Стратегија за интегриран развој на општина Илинден за периодот од 2017 до 2012 година.

Стратегијата се планира да биде усвоена од страна на Советот на општината, како нов стратешки документ за развој на општина Илинден до крајот на годинава.