Пемова најави обемни инфраструктурни проекти на ВМРО-ДПМНЕ

Пред нас претстои доста работа за реализирање на проектите од програмата која е обемна и која што содржи доста инфраструктурни проекти. Дел од тие проекти се образованието, здравството и патната инфраструктура, во која ќе инвестираме во иднина, изјави Весна Пемова, пратеничка од редовите на ВМРО-ДПМНЕ.

-Изминатиов период граѓаните на нашата земја се сведоци на градење на доста автопатишта, експресни патишта, регионални како и локални патишта, а доста и од овие проекти за патната ифрастуктура ќе се реализираат и во нашата општина. Во моментов се реновира патот Кавадарци-Росоман, ќе се изгради нов пат од селото Сопот кон Рибарци и ќе се доврши реконструкцијата на патот од Кавадарци до Неготино, вели Пемова.

Таа исто така стави акцент на значајниот и голем проект, а тоа е проектот Агропазар Македонија.

-Овој проект ќе функционира помеѓу просторот на Неготино и Демир Капија, а овој проект ќе опфати и многу складишни објекти, многу трговци, пакерски единици како и останати чинители на тој синџир на прибирање на земјоделските производи, нивно складирање и нивно дистрибуирање кон крајните потрошувачи во Република Македонија, а и надвор од нашата држава. Во овој проект се предвидува да се собира целото свежо земјоделско производство од Република Македонија и овде ќе се врши нивно калибрирање, пакување како и разладување, а одвде ќе се формира и нивната берзанска цена како и утовар и дистрибуција на свежите земјоделски производи до крајните потрошувачи, потенцираше Пемова.

Таа истакна и дека во овој регион ќе се формира аукциска куќа која ќе го организира надавањето на овие производи, а со еден збор на ова место ќе има голема концентрација на производители и на откупувачи, а тоа на земјоделските производи во иднина ќе им овозможи формирање на реална цена.