Попоски на сесија на Комитетот на министри на СЕ во Никозија

Делегација од Република Македонија, предводена од вицепремиерот и министер за надворешни работи Никола Попоски денеска и утре во Никозија ќе учествува на министерската сесија на Комитетот на министри на Советот на Европа (СЕ), под претседавање на Кипар.

Како што соопшти денеска Министерството за надворешни работи претставниците од земјите членки на Организацијата ќе ги разгледаат состојбите и актуелните предизвици, кои се приоритети на Советот на Европа, меѓу кои борбата против тероризмот, мигрантската криза, конфликтите и кризите во Европа и улогата на Советот на Европа, како и обезбедување долгорочна ефективност на Европската конвенција за човекови права.

На сесијата, претседавањето со Комитетот на министри на Советот на Европа од Кипар ќе го преземе Чешката Република, која ќе претседава до ноември оваа година.

На агендата на шефот на македонската дипломатија, се планирани и повеќе билатерални средби.