Иванов - Бокова: Македонија ги поддржува програмите на УНЕСКО за заштита на културно - историското наследство
Претседателот на Република Македонија д-р Ѓорге Иванов денеска во Аман оствари средба со генералнот директор на УНЕСКО, г-ѓа Ирина Бокова, на којабеше разговарано за тековните и идните активности и проекти на Република Македонија во соработка со светската организација за образование, наука и култура.
Двајцата соговорници ја потврдија одличната соработка меѓу Република Македонија и УНЕСКО, и изразија подготвеност за нејзино проширување во насока на натамошна реализација на проекти од областите на културата, образованието, науката, комуникациите, информациите, и во однос на програмите за млади и граѓанското општество.
Претседателот Иванов истакна дека Република Македонија придава големо значење на соработката со УНЕСКО и активно ги промовира и учествува во нејзините активности и иницијативи.
„Република Македонија ги поддржува програмите на УНЕСКО, и ние сме исклучително посветени во напорите за заштита на изобилното природно и културно-историско наследство кое го имаме“, посочи македонскиот претседател, и изрази благодарност за поддршката која УНЕСКО континуирано и ја дава на Република Македонија преку проекти реализирани во рамките на мултилатералната и директната соработка.
На средбата беа разменети мислења околу актуелните случувања во Република Македонија на политички план, информации за улогата на УНЕСКО во однос на бегалската криза, како и за актуелностите и реформските процеси во светската организација. Во таа наоска, Бокова го информираше претседателот Иванов за предизвиците со кои се соочува УНЕСКО.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа