ВМРО-ДПМНЕ: СЈО ги покрива штетните одлуки и договори на Владата

ВМРО-ДПМНЕ денеска го оквалификува Специјалното јавно обвинителство како канцеларија на СДСМ со чадна завеса за покривање на, стои во партиското соопштение, неспособноста на Владата, и за штетните одлуки и договори за државата.

- СЈО ја има задачата секогаш кога ќе биде актуелен договорот со Бугарија со кој СДС прифаќа заедничка историја и менување на историските факти, тема да не биде тој договор туку самото СЈО, секогаш наместо за платформи, штетни продажби, и криминални зделки, да се збори за СЈО која ја игра нарачаната ролја, соопштува ВМРО-ДПМНЕ.

СЈО, смета ВМРО-ДПМНЕ, има задача да води цел политички процес со единствената намера елиминација на ВМРО за слабеење на државата.

- Нашиот грев е што цели 11 години бевме на браникот на одбраната на државните и националните интереси на Македонија, што одолеавме на многу притисоци и закани поврзани со името на државата, името на нацијата и јазикот, со идентитетот на македонскиот народ, што одолеавме на неприфаќање потпишување разни штетни за нашата нација договори, или пак спроведување платформи на туѓи држави. Што се боревме за унитарноста на нашата држава, што се боревме да ја задржиме државата како што ја сака народот, а на како некои други што ја посакуваат, и што некој друг прифатил поинаку, па не знае како тоа да го изведе при силна и цврста ВМРО-ДПМНЕ со над 170 илјади членови и 455 илјади гласачи, се вели во соопштението.