Заев-Коѕијас:Затворање на прашањата низ меѓусебно разбирање за интерсите на двете држави

Претседателот на Владата на Република Македонија Зоран Заев, придружуван од министерот за надворешни работи Никола Димитров, денеска се сретна со министерот за надворешни работи на Република Грција Никос Коѕијас.

Премиерот Заев, како што информираат од неговиот кабинет, во пријателскиот состанок во пријатна и конструктивна атмосфера, со министерот Коѕијас изразиле заедничка определба за продлбочување на довербата помеѓу двете страни, низ принципиелни односи и меѓусебна грижа за интересите на двете држави и на народите во нив. 

- Само позитивен пристап во решавањето на отворените прашања меѓу државите, со меѓусебно почитување и разбирање, е иднината на регионот, рекол премиерот Заев.

Премиерот потенцирал дека новата Влада е фокусирана на развивање добрососедски односи, на европските вредности што се имплементираат низ отпочнатиот реформски процес, временски дефиниран во Планот 3-6-9, како и на активности важни за членството во НАТО, како што е престојното зголемување на буџетот на Армијата, со цел реализација на стратешките цели на државата, интеграцијата во ЕУ и во НАТО.

- Ако Република Македонија се придвижи напред, тоа ќе биде добро и за целиот регион, истакнал премиерот Заев.

На средбата, од двете страни биле потенцирани заложби за соодветни решенија за прашањата од заеднички интерес, за евро-атлантските перспективи на целиот регион.

- Ве поддржуваме во евро-атлатските аспирации. Сакаме стабилност во регионот и во вас гледаме добар сосед. Ние припаѓаме на мирољубиви држави. Република Грција нема геополитички и геостратешки интереси кон вашата земја. Отворени сме за ефикасно затворање на проблемите, кои некогаш може да значат и недоразбирања, преку респектирање на интересите на двете држави, рекол грчкиот министер за надворешни работи Коѕијас.

Тој, како чин на добра волја за продлабочување на соработката меѓу двете земји понудил размена на искуства и експертизи во реформскиот процес во нашата држава, важен за ЕУ и за НАТО. 

На средбата се разговарало и за унапредување на економската соработка, како и на соработката на полето на туризмот, енергетиката, образованието, културата, инфраструктурното поврзување.

Договорено било да продолжат посетите на високи политички нивоа во процесот на градење на довербата меѓу државите, што ќе биде дополнително охрабрување за развојот на пријателството меѓу граѓаните и соработката меѓу компаниите, како и работа на заеднички проекти значајни за квалитетот на живот на граѓаните во двете земји.