Дел од пациентите со леукемија без соодветна терапија

Триесет отсто од пациентите со Хронична миелоична леукемија во Македонија се без соодветна терапија. Еден од нив е и 57 годишниот Драган од Скопје кој пред 10 години бил дијагностициран со оваа болест. Терапијата која ја добивал не му помагала, поради што почнал да прима цитостатици, кои како што вели не се применувале никаде во Европа. 
Здравствената состојба на Драган се иксомплицирала и двете нозе морале да му ги ампутираат. 

„Повеќе гливикот, организамот не реагира на него и повторно сум вратен на цитостати што на некој начин секаде во Европа таа терапија не се применува, бидејќи може да предизвика влошувања на состојбата“, вели Драган – Пациент со ХМЛ.

И додека во европските земји на пациентите со ХМЛ им е достапна и втора и третолиниска терапија, во Македонија достапен е само еден лек.
Од здружението на пациенти бараат од здравствените власти пристап до современа терапија која за нив живот ќе значи.

„Македонија на располагање го има само иматинибот, досега.  Мислам, тоа не е случај ни со една земја во Европа Сите европски земји имаат на располагање второ линиска терапија. Никој не може да каже колку пациенти денеска се починати од  несоодветната терапија која ја примаат заболените од ХМЛ“, вели Пепо Леви – Претседател на здружение на пациенти со ХМЛ.

Иако пред три месеци пациентите добија ветување од Министерството, лековите се уште ги немаат добиено. Агенцијата за лекови ги обезбедила парите, но постапката за набавка закочила во Советот за јавни набавки. Надлежните не прецизираат кога, но уверуваат дека лековите ќе стигнат до пациентите.

„Кога Советот за јавни набавки ќе даде зелени светло ние го распишуваме тендерот,  јавните набавки  и тоа се поминува“, вели Роберт Беќировски – Директор на Агенција за лекови.

„Го имате Советот за јавни набавки кој ги прече постапките, значи во земји со уреден здравствен систем однапред се предвидуваат потребите од лекови и понекогаш се нарачуваат единици повеќе  за да не дојдеме во ситуација да немаме“, вели Гоце Чакаровски – Заменик-министер за здравство.

Заглавените тендерски постапки и административните процедури претходно ги оставија без лекови и пациентите со хемофилија и пулмонална хипертензија, чиј што живот беше доведен во ризик, а 20 деца со нарушување во растот исто така поради тендери деновиве ќе останат без хормонална терапија. 
Од Министерството за здравство велат дека ќе работат на системско решение на овој проблем за пациентите навремено да ги добиваат лековите.