Џафери: Мора да реагирам ако има барање од судската власт

Доколку до мене биде доставено барање од соодветна надлежна институција од судската власт јас не можам да избирам меѓу тоа дали ќе постапувам или не, затоа што како претседател на Собранието мора веднаш да ја препратам до Комисијата за деловнички и мандатно имунитетни прашања која е надлежна да расправа за барањето: Ова го изјави за МИА претседателот на Собранието Талат Џафери во врска со денешните приведувања на неколкумина пратеници за насилствата во Парламентот на 27 април годинава.

Извештајот на Комисијата потоа треба да се врати до Џафери, а врз база на тој извештај,  претседателот на Собранието свикува соодветна седница на која се расправа по однос на предлогот и барањето и за тоа одлучува Собранието.

- Во контекст на процедурите кои се пропишани со Устав и со Деловникот за работа на Собранието, сметам дека има дилеми по однос на почитувањето или непочитувањето докрај на соодветната процедура апропо одредбите од член 64 од Уставот каде е стриктно прецизирано дека пратеник не може да се лиши од слобода без одобрение на Собранието. Оваа одредба потоа ја прецизира Деловникот во деловите од членот 53 до 59 во сите аспекти на спроведувањето на таа одлука на Обвинителството. Во тој контекст сметам дека не се докрај испочитувани процедурите, изјави Џафери.

Утрово беа приведени Митко Чавков и неколку пратеници, вкупно 36 лица за настаните од Собранието на 27. април.