Одлуката за екстрадиција на Грујоски и Бошковски одложена за декември

За 13 декември е одложено рочиштето на Основниот суд во Солун на кое треба да се добие одговор на барањето на Министерството за правда на Република Македонија за екстрадицијата на бегалците Горан Грујоски и Никола Бошковски, двајцата обвинети во предметот на СЈО- „Тврдина 2“

Денешната расправа беше одложена поради отсутност на адвокатка од тричлениот адвокатски тим на Грујоски и Бошкоски, од една страна, и некомплетираниот превод на документацијата испратена од македонското Министерство за правда, од друга страна.

Дотогаш се очекува судот да ги добие преводите на документите, испратени од македонското Министерство за правда, што според неофицијални информации биле на француски јазик, а за да се одржи рочиштето морале да бидат преведени на грчки јазик.

Грујоски и Бошковски остануваат во притвор во затвор во непосредна близина на Солун.

Двајцата притворени поранешни фунцкионери во УБК, во петок треба повторно да излезат пред судот во Солун, каде ќе се оддржи третото продолжение на рочиштето за фалсификуваните патни исправи со кои беа фатени на 18 октомври на аеродромот во Солун.

Овој процес, што е независен од екстрадицискиот, досега двапати беше одложуван, бидејќи грчкиот суд неможеше да обезбеди преведувач кој би можел да преведува од македонски на грчки јазик и обратно.