Заев: Владата заедно со општините ги решава проблемите на комуналните претпријатија

 Многубројните проблеми со кои се соочуваат комуналните претпријатија беа разгледани денеска на средбата на премиерот Зоран Заев со генералните директори на комунални претпријатија во организација на Здружението на даватели на комунални услуги АДКОМ.

Заев ја акцентираше подготвеноста на Владата заедно со општините да ги решава насобраните проблеми, во интерес на граѓаните и подобро функционирање на претпријатијата.

Тој, како што соопшти владината прес-служба го истакна зголемувањето на финансиската помош од страна на Владата, како еден механизам, преку слевање на повеќе пари да се решат одредени проблеми околу функционирањето на претпријатијата на локално ниво.

- За наредната година со основниот буџет, којшто е на дебата, определивме 938 милиони денари допочнителни пари за основните, средните училишта и детските градинки. И најголем дел од тие пари се повторно за чистење долгови. Уште 200 милиони денари со репрограмирање ставивме за тие ставки на децентрализација. Целта е со едни пари кои ќе извртат насекаде да ги олесниме поголем дел од институциите. Школите сакаат да си платат, но немаат пари, комуналните претпријатија сакаат да си ги платат обврските. Така да преку овој механизам ќе се вбризгаат повеќе пари кај комуналните претпријатија коишто за вас ќе значат да си исплатите што е можно повеќе обврски, нагласи премиерот.

Посочи дека вториот дел се државните институции кои директно должат, министерства, јавни државни претпријатија, акционерски друштва. - Овде определивме големи пари, многу репрограми, се она што е резерва да се насочува кон комунални услуги, истакна Заев.

Оцени дека буџетот е проектиран за да овозможи финансиска и економска стабилизација на државата и изрази силни уверувања дека владата е определена да ја јакне локалната самоуправа што ќе го доближи одлучувањето до граѓаните а и позитивно ќе се отслика на работењето на комуналните претпријатија.