Министерот Филипче во работна посета на здравствените установи во Охрид

Министерот за здравство Венко Филипче денеска оствари работна средба со раководителите на здравствените институции во Охрид. Целта на неговата посета, како што самиот истакна, е да се запознае со работата на здравствените установи, преку разговор со нивните менаџерски тимови за проблемите во работењето и начините за нивно надминување.

– Во болницата „Свети Еразмо“ разговаравме за текот на реконструкцијата на објектот, како ќе продолжат градежните активности, како и за потребата на установата од соодветен кадар, едукација и доедукација, зголемување на квалитетот на услугите што се нудат и воведување нови, рече Филипче.

По неколку месечен застој ќе  продолжи реконструкцијата  на специјалната болница за ортопедија Свети Еразмо во Охрид, најави министерот. Сѐ уште не се знае дали во новиот објект ќе се пресели Институтот за кардиоваскуларни заболувања., како што беше предвидено во проектот.

Министерот најави дека се разгледуваат опции за нови вработувања и решавање на проблемот со недостиг на кадар во болниците.

Министерот за здравство истакна дека Министерството за здравство работи на намалување на смртноста на новороденчињата, состојба која беше актуелна минатата година и дека во тек се интензиви разговори со лекарите во педијатриската служба, во службите за интензивна нега на клиниките за педијатрија и гинекологија така што, рече, во одмината фаза е изготвувањето Стратегија за намалување на смртноста кај новороденчињата.

– Вклучени се и странски организации под капата на Обединетите нации кои нудат експертиза, а се формира и рамка за тренинг на кадарот за надминување на проблемот, како и планови за структурни промени во рамки на интензивната нега на гинеколошката клиника, во делот каде се лоцирани проблеми, рече министерот за здравство.

Најави и рамка за решавање на проблемот со набавката на инсулин, преку обезбедување поголеми количества и на тој начин елиминација на ризик од дефицит.

Министерот Филипче најави посета и на здравствените установи во Струга, како и предвидени одредени реконструкциски зафати на Општата болница во градот.