Груевски, Јанакиески и Трајковски дојдоа во суд за „Космос“

Поранешниот премиер и лидер на ВМРО-ДПМНЕ Никола Груевски, поранешниот министер за траснпорт и врски Миле Јанакиески и поранешниот градоначалник на општина Гази Баба Тони Трајковски, кои се обвинети во предметот „ТНТ“ на СЈО, денеска дојдоа во Кривичниот суд каде што треба да се одржи првото рочиште.

Во судот пристигна и бизнисменот и претседател на Партијата за европска иднина Фијат Цановски, сопственик на комплексот „Космос“, на чие уривање се однесува случајот „ТНТ“.

Во овој предмет, покрај Груевски, Јанакиески и Трајковски, обвинети се уште четири лица.

Со новиот годишен распоред предметот „ТНТ“ ќе го води судијата Огнен Ставрев.

Советот за оценка на обвинителен акт при Кривичен суд на 17 ноември минатата година го прифати обвинението за случајот „ТНТ“.

Апелацискиот суд на 4 ноември минатата година одлучи прислушуваните разговори во случајот „ТНТ“ за уривањето на комплексот „Космос“ да можат да се користат како докази во судската постапка.

Обвинителите од СЈО на јавна седница изјавија дека Груевски и Јанакиевски не се жртви на прислушкување, туку тие биле дел од власта што незаконски прислушкувала. Според обвинителите снимките имаат доказна вредност и со нив не се повредува приватноста на обвинетите.

Адвокатите на обвинетите сметаат дека прислушкуваните разговори се незаконски стекнати и со нив се нарушува приватноста на обвинетите.