Излизгани автомобили, лавини на патот и парализиран сообраќај во Македонија

Јавното комунално претпријатие и фирмата ангажирана за чистење на патиштата по вчерашниот аларм на жителите на горно-планинските села на Шара за блокирање на неколку патишта од снегот денеска од изутрината со забрзано темпо ги чистат патиштата и патот до планинските села, Шипковица, Бродец, Вешала и Бозовце.

Километарски редици од возила, излизгани автомобили и лавини на патот, ваква беше сликата изминатото деноноќие на патиштата во Македонија

Патиштата до селата се чисти, но на некои места се тешко проодни поради натрупаниот снег и појава на голомразица.

Од општина Тетово изјавија дека од денеска сите патишта се проодни, со одредени помали тештокии.

- По реакциите на жителите на планинските села вчера веднаш реагиравме и ги исчистивме сите патишта до селата на Шара и исто така патиштата низ Тетово, Порој и Речица. Денеска и следните два дена ќе почнеме со чистење на споредните патишта, а исто така ќе фрламе и сол за да не се појават голомразици, изјави портпаролот на општина Тетово, Арменд Фазлиу. 

Додаде дека досега се фрлени околу сто тона сол, чија вредност е некаде околу пет милиони денари.

- Дирекцијата за одржување на патиштата е снабдена со сол и друг потребен материјал за непречено функциуонирање во текот на овие снежни денови, додаде Фазлиу.

Жителите велат дека се задоволни од општината за преземените мерки за чистење на снегот, но бараат почесто фрлање сол со цел да не дојде до појава на голомразица во текот на ноќните часови, кога температурите паѓаат под нулата.

Тие упатија критики кон општинските органи поради тоа што не се преземаат мерки за чистење на споредните патишта кон овие села, кои исто така спаѓаат под надлежност на општината, поради што тие се принудени сами да ги чистат.