ВМРО-ДПМНЕ: Насилното изгласување на законот од СДСМ и ДУИ е газење на демократијата и покажување брутална моќ и сила

СДСМ ја погази демократијата, Уставот и законите, само за да изгласа закон со кој се надеваат дека ќе обезбедат поддршка за одржување на неспособната влада. Не ги загрижува тоа што цената од неуставниот, неприменлив и штетен закон ја плаќаат граѓаните и државата, се наведува во соопштнието од ВМРО-ДПМНЕ.

Од партијата додаваат дека одговорност мора да има и ќе има.

-Ова што го направија СДСМ и ДУИ е газење на демократијата и покажување брутална моќ и сила. СДСМ ја обезвредни улогата на Собранието и го поништи уставното право на пратениците, со амандмани да интервенираат во законските предлози. Партијата која од опозиција ветуваше дебата на секое прашање сега на сила и крајно игнорантски, оневозможи било каков вид на дебата, туркајќи еден штетен, неприменлив и неуставен закон, кој дополнително ќе ги продлабочи разликите во општеството. Ваквиот однос на СДСМ кон државата и сите оние кои имаат национални чувства се виде со политичкиот прогон поврзан со настаните од 27 април. Патриотите кои го кренаа гласот против катастрофалните политики на СДСМ на секое поле, први на своја кожа го почувствуваа политичкиот прогон кој го спроведува оваа власт, се наведува во партиското соопштение.

Од ВМРО-ДПМНЕ велат дека тие се најдоа во притвор со цел да се одвлече вниманието на јавноста од реалните и суштински проблеми на граѓаните и да се испрати порака на заплашување.

-Додека вистинските криминалци се на слобода, патриотите и неистомислениците на Заев  се по затворите. Судството веднаш мора да се ослободи од стегите на власта, а обвинителството наместо да работи по нарачка и да креира случаи за невини луѓе да започне да си ја врши работата и да се справи со напливот на криминал. Македонија мора повторно да стане правна држава, патриотите да се ослободат од притвор и од коструираните обвиненија и да се почитуваат Уставот и законите во државата. Судовите мора да прекинат да бидат главни соучесници во политичкиот прогон, стои во соопштението.

Политичкиот прогон, децидни се од ВМРО-ДПМНЕ, мора да запре веднаш, а судот да се ослободи од стегите на власта.

Владата на СДСМ место да се фокусира на политички прогон и реваншизам кон сите оние кои не се согласуваат со овие катастрофални политики, да го насочи своето внимание кон решавање на проблемите на граѓаните кои од ден во ден се се поголеми токму поради неспособноста на Зоран Заев и неговите соработници, се наведува во партиското соопштение.

 

 

 

17.03.2018 - 10:11

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега