И денеска во Прилеп протест против Законот за употреба на јазиците

Група Прилепчани кои се организирале преку социјалните мрежи денеска напладне блокираа дел од булеварот „Гоце Делчев“ и протестираа против донесувањето на Законот за употреба на јазиците, пишува МИА.

Тие, како што велат, му даваат поддршка на претседателот Ѓорге Иванов да не го потпишува указот за законот, затоа што бил штетен за македонскиот јазик и инсистираат со попис да се утврди вистинскиот процент на малцинствата што живеат во земјава.

- Иако еве малку се собравме денеска, а протестираме овие три дена, сепак ја испраќаме пораката дека нема да дозволиме нешто да се усвои надвор од Уставот и некој да не враќа во некои „филмови“, изјавил еден од присутните кој денеска протестираше.

- Пораката е дека му даваме целосна поддршка на претседателот Иванов да не го потпишува указот за Законот за употреба на јазиците. Овде во Прилеп се зборува на македонски и ова е Македонија и само еден службен јазик може да има во оваа држава, рекол еден од демонстрантите.