Законот за Математичко-информатичка гимназија го помина првиот филтер во Собранието
Пратениците во македонското Собрание попладнево во рамки на 38. седница дадоа поддршка на неколку предлог-закони во прво читање меѓу кои и на законот со кој се предлага основање на Математичко-информатичка гимназија.
Гимназијата ќе работи по наставни програми во кои посебен акцент ќе биде ставен на математиката, физиката и информатиката, а се предлага во нејзини рамки да функционира и еден вид центар за талентирани ученици. Услов за запишување ќе биде општиот успех на ученикот од најмалку 4,5 од шесто до деветто одделение и оценка 5 по предметите математика и физика, но ќе се полага и приемен испит.
Покрај ова, поддршка во прво читање доби и Предлог-законот за пријавување и евиденција на обврските, чиј предлагач е Министерството за финансии, а со кој ќе се врши регистрација на сите неплатени обврски од страна на државните институции.
На второ читање беа проследени и Предлог-законот за бесплатна правна помош, Предлог-законот за меѓународна и привремена заштита и Предлог-измените на Законот за превоз на опасни материи во патниот и железничкиот сообраќај.
Во попладневниот дел беше разрешен Видан Кулевски од функцијата член на Регулаторната комисија за енергетика.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа