Собранието не ја прифати интерпелацијата за Димитров

Со 59 гласа „против“, 20 гласа „за“, без воздржани Собранието на Република Македонија вечерва не ја прифати интерпелација на министерот за надворешни работи Никола Димитров, поднесена од страна на група на пратеници од ВМРО-ДПМНЕ.

Опозицијата го обвини Димитров дека ја извршува функцијата несовесно, нестручно и спротивно на македонските интереси и оти со потпишаните договори со Бугарија и Грција се загрозуваат македонските интереси.

Во завршното обраќање министерот Димитров ги повика пратениците заеднички да се фокусираат на приоритетите и да разговараат за работи што се вредни за расправање.

– Ние конечно се исправаме на нозе. Порано или подоцна со мудра политика, помалку навреди и повеќе заедништво, мислам дека ќе светлината ќе ја победи темнината. Да се расправаме за работи што се очигледно вредни за расправање –  од даночна политика, состојбите во економијата….. Дајте заедно да си се фокусираме, да си имаме приоритети и да не биде прашање на живот или смрт кој ќе победи, а кој нема да биде на власт. Мислам дека сега е времето тој чекор да го направиме, им порача Димитров на пратениците во Собранието.

Собранието по останатите точки од дневен ред на оваа седница ќе продолжи утре во 11 часот.