СДСМ: Нашите одговорни политики ги зголемија пензиите на 324.000 пензионери за 722 денари
СДСМ е одговорна партија, која со сериозна реформа на пензискиот систем обезбеди 324.000 пензионери од почетокот на 2020 година да добијат покачување на пензиите за 722 денари. До крајот на 2020 година пензиите ќе пораснат до 900 денари, и ќе се зголемуваат заедно со растот на економијата, покачувањето на минималната и на просечната плата, се вели во денешното соопштение на СДСМ.
„Сега просечната пензија изнесува 15.500 денари и е зголемена за 1.746 денари, во однос на 2016 година кога беше 13.754 денари. Зголемувањето на пензиите не се финансира со задолжувања, како што тоа паушално го правеше претходната власт, туку е резултат на домаќинското работење на СДСМ и спроведувањето на пензиската реформа. СДСМ успеа да го стабилизира пензискиот систем и да го намали дефицитот во Фондот за пензиско и инвалидско осигурување за 3 милијарди денари. Истовремено приходите во фондот се зголемени за 10 проценти. СДСМ се грижи за сите граѓани, и го враќа достоинството на луѓето кои ја градеа оваа држава и го трасираа патот за младите. По 12 април продолжуваме со реализација на мерките што обезбедуваат економски раст, подобрување на животниот стандард и повеќе пари во семејните буџети“, стои во соопштението на СДСМ.
03.02.2020 - 09:01
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
