Познати се носителите на кандидатските листи на ВМРО-ДПМНЕ

Професорката Гордана Силјановска Давкова и оперскиот пејач Игор Дурловски меѓу носителите на листи на опозициската ВМРО-ДПМНЕ, официјално потврдуваат од партијата.

Силјановска, која беше кандидат на партијата за претседател, ќе ја предводи листата во првата изборна единица, а Дурловски ќе биде носител во 5-ката.

Генералниот секретар на партијата, Игор Јанушев ќе ја предводи листата во ЕИ 4 и ќе му биде директен противкандидат на генералниот секретар на СДСМ, Љупчо Николовски.

Потпретседателот Александар Николовски, пак, ќе се соочи со претседателот на СДСМ, Зоран Заев.

Во ИЕ2 листата ќе ја предводи поранешниот министер за транспорт и врски, Владо Мисајловски, во ЕИ6 прва на листа ќе биде Дафина Стојановска.

Претседателот на партијата, Христијан Мицкоски нема да биде кандидат за пратеник, бидејќи вели дека претендира да стане премиер, а не пратеник.

Кандидатите за пратеници на ВМРО-ДПМНЕ и коалицијата ќе бидат промовирани утре на партиска конвенција во Македонската филхармонија. Засега нема инфромација дали е можно нејзино одложување по денешните владини препораки за неодржување на јавни собири поради коронавирусот.