Јанушев: Поднесовме предлог до Владата за поголема поддршка на погодените бизниси

Нема ниту еден субјект кој ги пофали економските мерки на владата. Пакетот мерки е недоволен и далеку од ефикасен за економијата. Ние имаме конкретни предлози кои до сега се неприфатени. Токму затоа ќе се бориме и понатаму да се издејствуваат мерки кои навистина ќе му помогнат на стопанството и ќе го заштитат на стандардот на граѓаните, напиша на Фејсбук генералниот секретар на ВМРО-ДПМНЕ, Игор Јанушев.

Вели дека партијата денеска поднесе предлог-уредба со законска сила за да се одржи ликвидноста на компаниите.

-Предмет на субвенционирањето е одржување на ликвидноста преку исплатата на бруто плата на работниците во компаниите за месеците март, април и мај 2020 година во износ од најмногу 50% од месечната бруто плата по работник.  За користење на субвенциите, компаниите треба да исполнат 2 услови, и тоа: Намалувањето на вкупните приходи на компанијата во месеците март, април или мај 2020 година да изнесува повеќе од 20% во однос на вкупните просечни приходи на месечно ниво остварени во 2019 година или најмалку 10% од вработените во компанијата да отсуствуваат од работа заради прогласување на вонредната состојба и спроведување на мерките на Владата и  компанијата да не исплаќа дивиденда од денот на влегувањето во сила на уредбата до денот исплатата на платата за месец јуни 2020 година, напиша Јанушев.

Оттаму, партијата предложи и начин за субвенционирање на бруто платите на работниците.

-Ако намалувањето на вкупните приходи на компанијата изнесува од 20% до 30%, субвенционирањето на бруто платата по вработен изнесува 20%,  ако намалувањето на вкупните приходи на компанијата изнесува од 30% до 40%, субвенционирањето на бруто платата по вработен изнесува 30%,  ако намалувањето на вкупните приходи на компанијата изнесува од 40% до 50%, субвенционирањето на бруто платата по вработен изнесува 40% и ако намалувањето на вкупните приходи на компанијата изнесува над 50%, субвенционирањето на бруто платата по вработен изнесува 50%, напиша Јанушев.

Според него, висината на месечната субвенција по работник може да изнесува максимум до висината на просечната месечна исплатена нето-плата по вработен во декември 2019 година.

-Субвенционирање не може да користат компаниите само во случај ако ја намалат платата на работникот за периодот додека се користат субвенциите, како и органите на државната и на локална власт (институциии која вршат дејност од областа на образованието, науката, здравството, културата, трудот, социјалната заштита и заштитата на детето, спортот, агенции, фондови, јавни установи, јавни претпријатија и трговски друштва основани од државата, општините). Владата ако му мисли добро на стопанството ќе ја прифати оваа мерка. Ова е само мал дел од она што предлагаме да се направи. Продолжуваме да се бориме за стандардот на граѓаните, затоа што ја сакаме Македонија, напиша Јанушев.